Logo

कसैलाई भोकै बस्न दिइने छैनः अर्थ मन्त्री शर्मा

Samachar Rekhanews १७ भाद्र २०७९, शुक्रबार २१:४५ मा प्रकाशित

१७ भाद्र, नेपालगञ्ज । लामो समयदेखि पर्याप्त वर्षा नहुँदा सुख्खा क्षेत्र घोषणा गरिएको नरैनापुर गाउँपालिकाको अर्थमन्त्री जनार्दन शर्माले शुक्रवार स्थलगत अनुगमन गरेका छन् ।
अर्थ मन्त्री शर्माले नरैनापुर क्षेत्रको सुख्खा ग्रस्त क्षेत्रमा कुरा गर्दै नरैनापुरको घडेरी देख्दा मलाई मर्माहत बनाएको बनाउदै उनले मन्त्री परिषदमा गएर कुरा राख्ने र तत्काल केन्द्रीय सरकारबाटै राहतको व्यवस्था गराउने बताए ।
अर्थ मन्त्री शर्मा नरैनापुरका स्थानीय जनप्रतिनिधि, किसान र सर्वसाधारणसंग विस्तृत रुपमा जानकारी लिनुका साथै मन्त्री शर्मा गाउँपालिकाको केही वडामा पुग्नुका साथै भारतीय सिमा नाका बघौडा सम्मको स्थलगत अनुगमन गरेका थिए ।
पर्याप्त पानी नपर्दा सो क्षेत्रमा जेनतेन १५ प्रतिशत मात्रै रोपाई भएको र सो पनि पछि सुकेर काम नलाग्ने भएको नरैनापुर ५ का वडा अध्यक्ष कृष्ण चन्द्र मौर्यले मन्त्रीलाई जानकारी गराएका थिए ।
स्थलगत अनुगमनको क्रममा अर्थमन्त्री शर्माले अधिकाँश खेती योग्य जमिन बाँझो रहेको आफुले प्रत्यक्ष देखेको जनाउँदै आवश्यक व्यवस्था मिलाउने प्रतिवद्धता जनाए ।
सो समस्याका बारेमा मन्त्री परिषदको बैठकमा जानकारी गराउनुका साथै प्रधानमन्त्रीसंग पनि कुरा गर्ने बताए ।
अर्थमन्त्री शर्माले तत्कालका लागि के गर्न सकिन्छ र बाँझो खेतलाई कसरी उपयोग गर्न सकिन्छ भन्ने बारेमा निश्कर्ष निकालेर अगाडि बढ्ने जनाउँदै सरकारले कसैलाई भोकै बस्न नदिने बताए ।
सिंचाइको व्यवस्था नभएकोले अधिकांश किसानहरु वर्षाको भरमा खेती गर्न बाध्य रहेको बताउँदै गाउँपालिका अध्यक्ष इस्तियाक अहमद शाहले यसपटक लामो समयदेखि वर्षा नहुँदा धान रोपाइँ नभएकोले सुख्खा क्षेत्र घोषणा गरिएको जानकारी गराउँदै किसानलाई राहत दिन माग गरे ।
सो क्षेत्रमा सिंचाइको लागि हरेक वडामा तीन तीन वटा डिप बोरिंग जडान गरेर अन्य वैकल्पिक व्यवस्था गर्न, सिंचाइको लागि किसानहरुलाई सहुलियत स्वरुप डिजलको व्यवस्था गर्न, किसानहरुको सुविधाको लागि कृषि विद्युतीकरणको व्यवस्था गर्न र कृषि मिटर उपलब्ध गराई विद्युत महसुल निःशुल्क गर्न मन्त्री शर्मालाई अध्यक्ष शाहले आग्रह गरेका थिए ।
मन्त्री शर्मासंगै लुम्बिनी प्रदेशसभा सदस्य कृष्णा केसी नमुना, बाँकेका प्रमुख जिल्ला अधिकारी सुर्य बहादुर खत्री, बाँकेका प्रहरी प्रमुख एसपी श्याम कृष्ण अधिकारी, प्रमुख प्रशासकिय अधिकृत भरत बस्नेत, नरैनापुर १ का वडा अध्यक्ष इशाक जोलाह, २ का वडा अध्यक्ष मसुद अहमद शाह, ३ का वडा अध्यक्ष अजय मिश्रा, ४ का वडा अध्यक्ष मनोज शर्मा, ५ का वडा अध्यक्ष कृष्ण मौर्य लगायतको टोलीले नेपाल–भारतको सिमासम्म स्थलगत निरिक्षण पनि गरेको थियो ।
वर्षा नभएर शतप्रतिशत सुख्खा भएपछि यस अघि गाउँ कार्यपालिकाको बैठकले पालिकालाई सुख्खा क्षेत्र घोषणा गरि ८० प्रतिशत करमा छुट दिने निर्णय गरेको थियो । जिल्लाकै सबैभन्दा दुर्गम र पिछडिएको मानिने नरैनापुरका अधिकांश किसान आकाशे पानीको भरमा खेती गर्दै आएका छन् ।
सो पालिकामा तीन हजार सात सय हेक्टर खेती योग्य जग्गा रहेकोमा २६० हेक्टरमा मात्र सिंचाई सुविधा रहेको र अहिले पानी नपर्दा ती सबै सिंचाईका स्रोत पनि सुकेकोले पानी नआएको गाउँपालिकाले जनाएको छ ।
अनुगमनमा पुगेका मन्त्री शर्मालाई नरैनापुर गाउँपालिका अध्यक्ष शाहले खादा र टोपी लगाएर स्वागत गरेका थिए भने प्रमुख प्रशासकिय अधिकृत भरत बस्नेतले गाउँपालिकाको डायरी हस्तान्तरण गरेका थिए । कार्यक्रमको सञ्चालन जिन्सी शाखा प्रमुख भरत महतोले गरेका थिए ।


लोकप्रिय समाचार
ताजा समाचार

लोकप्रिय छुटाउनुभयो कि ?