बाँके असार ७ गते ।
बाँकेको लक्ष्मणपुर बाँध र कलकलवा तटबन्धका कारण वर्सेनि नेपाली भुभाग डुवानमा पर्ने गरेको छ। तर अहिलेसम्म उक्त समस्याको समाधान हुन सकेको छैन् । भारतले नेपाली सीमाना नजिकै निर्माण गरेको लक्ष्मणपुर बाँधको बाँकेका सांसदहरु त्था सुरक्षा निकायका उच्च अधिकारीहरुको एक टोलीले स्थलगत निरिक्षण गरेको छ ।
बाँकेका प्रमुख जिल्ला अधिकारी शिवराम गेलालको नेतृत्वमा लक्ष्मणपुर बाँध पुगेको सो टोलीले बाँधको निरिक्षण गर्नुका साथै त्यहाँ रहेका भारतीय अधिकारीहरुसंग छलफल गरेर बाँधका ढोकाहरु खुला राख्न आग्रह समेत गरेको छ ।
बाँधकै कारण हरेक वर्ष नरैनापुर र राप्तीसोनारी तथा डुडुवा क्षेत्रमा राप्ती नदी र अन्य खोला नालामा बाढी आउने गरेको स्थानीयको भनाई छ । बाँके जिल्लालाई डुबान र बाढीबाट जोगाउन लक्ष्मणपुर बाँधको अवस्था बुझ्न र बाँधका ढोकाहरुको समेत निरिक्षण गर्न त्यहाँ पुगेको जनाउँदै बाँकेका प्रमुख जिल्ला अधिकारी गेलालले बाँधका ढोकाहरु खुला राख्न आग्रह गरिएको बताउनुभयो । उहाँले बाँधमा रहेका भारतीय सुरक्षा अधिकारी र सिचाई विभागका कर्मचारीसंग भेटेर दुबैतर्फ डुबान र क्षति नहुने गरि मिलेर काम गर्नु पर्ने कुरामा जोड दिनु भएको थियो ।
सो अवसरमा भारतीय सिचाई विभागका कर्मचारी पिन्टुसिंहले बाँधको बारेमा जानकारी गराउँदै सकेसम्म ढोका बन्द नगर्ने गरिएको तर धेरै पानी आएर ठुलो क्षति हुने देखेपछि केही ढोका बन्द गर्नु परेको बताउनुभयो ।
लक्ष्मणपुर बाँध पुगेको सो टोलीमा विघटित प्रतिनिधीसभाका सांसद महेश्वर गहतराज अथक, प्रदेशसभाका सांसद कृष्ण केसी नमुना, बाँकेका प्रहरी प्रमुख एसपी ओम राना, शसस्त्र प्रहरी प्रमुख अशोक बम, राष्टिय अनुसन्धानका जिल्ला प्रमुख लगायतको सहभागिता रहेको थियो । बाँधको स्थलगत अनुगमन र निरिक्षण पछि प्रतिक्रिया दिंदै विघटित प्रतिनिधीसभाका सांसद अथकले भारतले निर्माण गरेको यसै बाँधका कारण बाँके जिल्लामा बर्सेनी बाढी र डुबान हुने गरेको बताउनुभयो ।
उहाँले यो बाँधको ढोकाहरु खुला राख्न तथा यसबाट हुने क्षति रोक्नका लागि कुटनितिकस्तरमा भारतसंग नेपाल सरकारले कुरा गर्नुपर्ने बताउनुभयो । भारतले सन् १९८० मा लक्ष्मणपुर बाँध निर्माण कार्य सुरु गरेर सन् १९८५ मा सम्पन्न गरेको थियो । मार्जिनल तटबन्ध भने सन् २००० मा निर्माण सम्पन्न गरेको हो ।
साढे २२ किलोमिटर लम्बाइ, पाँच मिटर चौडाइ र पाँच मिटर उचाइ भएको लक्ष्मणपुर बाँध र कलकलवा तटबन्धका कारण हजारौँ सर्वसाधारण डुबानमा पर्दै आएका छन् । भारतले एकपछिय रुपमा निर्माण गरेको सो बाँधका कारण बाँकेको पूर्व दक्षिणमा पर्ने मटेहिया, सोनवर्षा, होलिया, फत्तेपुर र गंगापुरका सयौं विगाहा जग्गा बगरमा परिणत हुने गरेका छन् ।
