१६ कार्तिक, नेपालगन्ज । ‘नम्बर प्लेट परिवर्तन तथा ध्वनी प्रदूषण गर्ने सवारी साधन कारवाही अभियान’ अन्तर्गत ट्राफिक नियम उल्लंघन गर्ने सवारी साधन उपर कारवाही गरिएको छ ।
जिल्ला प्रहरी कार्यालय बाँके, जिल्ला ट्राफिक प्रहरी कार्यालय बाँके तथा मातहत समेतबाट संयुक्त रुपमा खटिएको प्रहरी टोलिद्वारा कार्तिक ७ गतेदेखि हालसम्म साप्ताहिक रुपमा संचालन गरिएको ‘नम्बर प्लेट परिवर्तन तथा ध्वनी प्रदूषण गर्ने सवारी साधन कारवाही अभियान’ अन्तर्गत नम्बर प्लेट परिवर्तन गरी यात्रु ओसारपसार कार्यमा संलग्न जम्मा ३८ वटा ईभी गाडी नियन्त्रणमा लिइ आवश्यक कारवाहीको लागि यातायात ब्यबस्था कार्यालय नेपालगन्ज बाँके पठाईएको छ ।
यस्तै सवारी साधनको स्वरुप परिवर्तन ‘मोडिफाई’ गरी ध्वनी प्रदुषण गर्ने जम्मा १९ वटा मोटरसाईकलहरु नियन्त्रणमा लिई पुनः सोही स्वरुपमा बनाउने गरी ट्राफिक जरिवाना गरी छाडिएको जिल्ला प्रहरी कार्यालय बाँकेका नि. सूचना अधिकारी प्रहरी निरीक्षक जीवराज थापा क्षेत्रीले जानकारी गराएका छन् ।
यसका साथै बाँके प्रहरीले कुनै पनि सवारी साधनको बास्तविक स्वरुप परिवर्तन तथा ध्वनी प्रदुषण नगर्न, नगराउन हुन सम्बन्धित सबैमा अनुरोध गरेको छ ।
