१८ कार्तिक, नेपालगन्ज । वडा प्रहरी कार्यालय, नेपालगन्जका प्रमुख प्रहरी निरीक्षक (इन्स्पेक्टर) शेखर खड्काले नगरमा शान्तिसुरक्षा कायम गर्न हरसम्भव प्रयास गर्ने प्रतिबद्धता व्यक्त गरेका छन् ।
आइतवार मात्र वडा प्रहरी कार्यालय नेपालगन्जको कमाण्ड सम्हालेका प्रहरी निरीक्षक शेखर खड्काले मंगलवार कार्यालयमा आयोजित पत्रकारसँग परिचयात्मक कार्यक्रममा उक्त प्रतिबद्धता जनाएका हुन् । सो अवसरमा बोल्दै उनले नगरमा विद्यमान लागु औषध, सामाजिक विकृति, साइबर क्राइमका घटनाहरु सम्पूर्ण स्टेक होल्डरको साथ र सहयोगले जनचेतनाको माध्यमबाट न्यून पार्न कटिबद्ध भएर लाग्ने बताए ।
सोही अवसरमा नेपालगन्जका क्रियाशील पत्रकारहरुले नगरमा विद्यमान समस्याहरुको बारेमा आ–आफ्नो भनाईहरु राखेका थिए ।
इन्स्पेक्टर खड्काले आइतवार वडा प्रहरी कार्यालय नेपालगन्जको प्रमुखका रूपमा पदभार ग्रहण गरेका हुन् ।
वडा प्रहरी कार्यालय नेपालगन्जको कमाण्ड सम्हाल्दै इन्स्पेक्टर खड्काले इमान्दारितापूर्वक काम गर्न वडा प्रहरी कार्यालयमा कार्यरत सकल दर्जालाई निर्देशन दिएका छन् ।
इन्स्पेक्टर खड्का केन्द्रीय अनुसन्धान ब्यूरो पिलर ४ बन्यजन्तु तथा वातावरणसँग सम्बन्धित अपराध अनुसन्धान शाखा लाजिम्पाटबाट सरुवा भएर वडा प्रहरी कार्यालय नेपालगन्जको कमाण्ड गर्न आइपुगेका हुन् ।
यसअघि वडा प्रहरी नेपालगन्जको प्रमुखमा इन्स्पेक्टर अरुण बम थिए ।
