३० कार्तिक, नेपालगन्ज । नेपालगन्जबाट रुपईडिहा हुँदै भारततर्फ जाँदै गरेको अवस्थामा पक्राउ परेका दुई विदेशी नागरिकलाई १४ दिनका लागि न्यायिक हिरासतमा राखिएको छ ।
सुरक्षा अधिकारीले जनाए अनुसार, शंकास्पद अवस्थामा शनिबार नियन्त्रणमा लिएर अनुसन्धान गर्दा उनीहरू भारत यात्राका लागि आवश्यक कुनै पनि वैध कागजात बिना नै सीमा पार गर्न खोजेको खुलेको छ ।
एसएचओ रमेश सिंह रावतका अनुसार, रुपैडिहा बीओपीका एसएसआई जगत दास, महिला कन्स्टेबल रानी कुमारी, टी. यमुना र ज्योति सिंहसहितको संयुक्त टोली आवत–जावत गर्दै गरेका व्यक्तिहरूको कागजात जाँच गरिरहेको समयमा ती दुईलाई रोकेर विस्तृत जाँच गर्दा कागजात अभाव पुष्टि भएको हो ।
पक्राउ परेका व्यक्ति ६१ वर्षीया सुमित्रा शकील ओलिभिया रहेको प्रहरीले जनाएको छ । प्रहरीका अनुसार, उनी कर्नाटकको उडुपी निवासी जोन फ्रेडरिक सुमित्राकी छोरी हुन् र हाल बेलायतको ग्लुसेस्टरस्थित २५ हार्कोम्ब ड्राइभमा बसोबास गरेको खुलेको छ ।
त्यस्तै उनका सहयात्री ३५ वर्षीय हसन अम्मान सलीम बेलायतको म्यानचेस्टरस्थित १ ए डालमोर्टन रोडमा बस्दै आएका छन् । हसन पाकिस्तानी मूलका नागरिक रहेको बताइएको छ ।
दुवैले भारत प्रवेशका लागि कुनै पासपोर्ट–डाभिडा वा कानुनी कागजात प्रस्तुत गर्न नसकेपछि उनीहरूलाई अवैध रूपमा सीमा पार गर्ने प्रयासको आरोपमा मुद्दा दर्ता गरी बहराइचको अदालतमा पेश गरिएको प्रहरी जनाएको छ ।
यसबीच दुवै जनालाई अहिले बहराइच कारागारमा राखिएको छ र उनीहरुमाथि थप १४ दिन न्यायिक हिरासतमा राखी अनुसन्धान अघि बढाइएको भारतीय अधिकारीहरुले जनाएका छन् ।
पक्राउ परेका दुई विदेशी नागरिक बि.एन. अस्पताल नेपालगन्जले सञ्चालन गरिरहेको कान अप्रेशन शिविरका प्राविधिक रहेको पुष्टि भएको छ ।
अस्पतालले ब्रिनोज यूके, ब्रिटेन नेपाल अटोलोजी सर्भिस यूकेको सहकार्यमा कार्तिक २२ गतेदेखि कान अप्रेशन शिविर सञ्चालन गर्दै आएको थियो । यसका लागि ब्रिटेनबाट ईयर सर्जन डा. म्याकलम पावल हिल्टनको नेतृत्वमा व्यवस्थापक रोविन योङ्स, ६१ वर्षीया कान प्राविधिक सुमित्रा शकील ओलिसिया र ३५ वर्षीय हसन अम्मान सलीम एक हप्ता अघि नेपालगन्ज आएका थिए ।
उक्त टोलीका प्राविधिक हाल ब्रिटिश नागरिक रहेका सुमित्रा र हसनलाई शनिवार नेपालगन्जको जमुनाह नाका पार गरी रुपैडिया प्रवेश गरेपछि भारतीय सीमा सुरक्षा बलले पक्राउ गरेको थियो ।
